真正的家人‥‥

今日本來去JOSEPH STUDIO到拎DISC同睇第二次排版
但改了下星期
因為琴晚同B入左急症室
到今朝七點先番到屋企
兩個都請了病假
在家睡了一天。


阿B一直有鼻敏感也有眼敏感
在冷氣勁或多毛毛既地方佢既鼻敏感會好嚴重
鼻塞、多鼻水、訓唔到
由細到大都係咁
至於眼
以前住舊居時佢都試過三四次訓醒時某隻眼腫哂
係D眼白突哂出黎隻眼狂流眼水
成隻雞蛋咁個隻
原因不明
不過自從我地搬左出黎住之後就冇試過喇。

琴日
阿B去飲
我十點幾就訓左
突然
半夜三點佢嗌醒我
我已經心知不妙
唔係大事佢唔會敢嘈醒第二日要番工既我!!

佢原來雙眼腫哂
係兩個紅色既圓圈圈住兩隻眼咁
而且係腫起既
佢根本張唔大雙眼
而且佢變得氣促
有D抖唔到氣
仲同我講成身痕


我睇過佢身冇出紅點
但都知道一定係敏感
我總覺得係食物敏感!!!!雖然佢從來都冇!!!
因為我好記得個同事同我講佢仔仔食物敏感時既徵狀
所以我總覺得係!!!

過左十分鐘我見佢都冇好轉
(其實佢係訓時已FEEL到有D野但照訓!
然後係俾雙眼整到痛醒!!因為眼皮係好熱好腫架!!!)
我已經打算去急症
佢都唔係咁想去
仲話去24小時醫務所
又話不如坐多陣先!!

不過我個刻好當機立斷
我已經唔理得係咪濫用急症室服務
我只係知佢係對眼有事
而對眼係可大可小
我唔敢搏
即刻CALL的去!!!!!!!

去到真係好彩
唔多人
而且撞到老死!!
所以阿B好快可以見醫生
而且好快就俾醫生打左支抗敏感針
勁快就昏迷
而醫生係要佢係度訓
因為怕佢會暈
我一個人坐係旁邊
由三點幾坐到六點幾
我冇訓到
又驚佢凍要拎氈俾佢
又驚醫生失驚無神嗌佢名

我坐係醫院
見到好多人
有媽媽帶住仔囡
有仔囡陪老人家
有老公陪老婆
不同年紀
個個都好累
因為當時係半夜
我都好累

不過我係度諗
如果仲係細個
陪阿b入急症室既一定係佢媽媽
我應該只會在第二朝訓醒時收到佢sms話我知佢琴晚有一件咁既事
但而家一齊住
佢有咩事一定係第一個搵我
基本上我係責無旁貸

可能之前大家都好健康
所有野都好順利

所以我真係係個一刻
先真正覺得
我同佢已經唔係普通既男女朋友
我地真係一對要互相照顧
不論對方疾病痛苦都要一齊面對一齊承擔既家人


甜蜜幸福的prewedding相片
其實都比不上昨晚我在醫院看到的種種片段‥‥

中年丈夫為醫生未能好好減輕妻子痛楚而動怒
年輕丈夫東奔西跑為妻子找輪椅找薄氈
父母因為子女的病痛而愁眉深瑣‥‥


縱然人人面容蒼白
沉默不語
絕不是一個美麗的畫面
不過
我想
這種對親人義無反顧的照顧和承擔
才是真正的婚姻，真正的家庭之道。


而婚禮既種種
其實真的微不足道‥‥‥




所以大家為了愛你疼你的家人
大家都要注重身體，保持身體健康啊!!!!!!