緊接下來的items~~

已經變成了打日記‥‥
因為番晏關係
朝早呢一段係我唯一一段可以打BLOG既時間
所以我都好好把握
因為我好想將我雜亂的IDEA或心情用文字記低
讓自己有跡可尋
也可令自己放鬆一點~~~

昨天淘了兩條裙
選了一些飾物
又向BLOG友hold了一些婚後物資(也是飾物)
我本身就喜歡有飾物
所以一買上來根本就是放肆了
不同類型的都想有!!!
(一d都唔平!!!)

其實全都是用來影prewedding用的
不是joseph沒有提供
只是總覺得自己先預備了心裡踏實點!!!

還有買多了可以for十月影wedding buddy個輯用
而且明年可能有另一輯呢‥‥‥(自我說服中!!)

(打到呢度
突破發現特區護照過左期!!!!!!!!!!!!!!!!!!!!!!!!!!!!!!
死啦!!!!!!!!!!!!!換證要幾耐﹖
好在我心血來潮CHECK一CHECK!!!!
琴日打到呢度就忙到團團轉!!!今日31/7再續!!!
死喇死喇!!星期一我要朝早去拎籌喇!!網上booking已full!!!
蝕左一日人工!!!!冇計!!!!
如果拎到仲可以剛剛好在出發前拎到!!
我仲打埋俾joseph叫佢出封信證明我去影相
阿姨幫我去北角拎埋!!
希望見到入境主任時冇問題啦!!!!!)


joyce的花球下星期會有
佢仲suggest左我選咩色衫影相
多謝佢既意見!!
常常在fb看到佢為其他新人設計佈置的wedding
最近的「照相」theme真係好靚
更肯定自己無搵錯人
進步同有heart真係好重要!!
而我肯定自己之後會不斷加items
一定out完再out budget‥‥‥


8月中後影完相番黎
有d野都要開始喇~~
1、婚介~(先去vca先!!snow話9月前都有著數!!!)
2、花車~(我仲未睇岩主花車!!!我想要mini cooper!!!但太細‥‥‥)
3、褂and另一婚紗~(即係要約cocoon~~!!突然我又想試埋傳統褂!!心大心細~~!!!)
4、結婚蛋糕~
‥‥‥

七七八八
番黎先算!!


而家最重要係有得出發!!!
我‧真‧係‧好‧擔‧心!!!!!!!!!!!!

頭髮~

唔知你地滿唔滿意自己D頭髮呢﹖
你地日常多唔多做TREATMENT呢﹖

其實我直至中學時都好滿意自己把頭髮架
真係好黑好順滑而且好多!!!
(我唔係搽護髮素架!!!)

不過入U後個頭未試過黑色
畢業時又開始電曲(不過我未電過負離子!!!)
之後斷斷續續都KEEP住一年電一至兩次髮
D髮質不知不覺咁差哂


我其實一直自恃頭髮多
首先係髮型師每次幫我剪完頭髮都要好耐時間
地下當然係滿佈「殘骸」

以至於SHARON、GINGKO同MAVIS幫我SET頭時
(仲有joseph photo既nicole)
都異口同聲話我真係好多頭髮
所以我雖然覺得髮質差左外
都唔係好擔心

不過
阿b就不斷話我少頭髮
呢一兩年不斷講
我唔係真係好明
點解當個個都話我多頭髮剩係佢一個話我少!!!!
(我絕對相信佢唔係出自妒忌!!!)

原來佢係將我以前同而家比!!!
加埋我地一齊住
佢會真係見到我甩左幾多頭髮
所以佢講得多我又留意下
真係又有d驚喇!!!!!

所以呢開始用hair mask啦
同得閒時用下護髮素!!!
但除了敷完mask個日好d外
其他日子都冇乜改善
都係打結、開差
摸落去唔順!!(而我係會格硬扯的‥‥‥)

不過呢
前排睇完本書之後
改變左洗頭方法
真係好有改善啊!!!
我試左四日
日日都好好~~~好耐冇試過日日都咁滑啊d頭髮!!
所以好想同大家分享下!!!

其實冇咩特別
只要你有時間就可以了!!

就係每次洗頭都用兩次洗頭水同兩次護髮素
不過第一次用時係乾頭先搽護髮素
待三四分鐘後用水洗再用一次洗頭水
過水後用第二次洗頭水
但這一次待一兩分鐘先沖水
讓泡沫浮起頭髮內既污垢
最後再用一次護髮素~~~
再過水就ok喇!!!!!


過程係複雜左
不過我覺得效果好過一個月做一次焗油
又便宜又開心!!!


仲有如果想血液循環好d
洗頭時係應該俯身向下洗
由後腦位置開始向上洗
咁會比我地用淋浴式洗頭對身體好d架!!
(不過我都改唔到!!!)


希望以上方法對大家都有用啦!!!!

無事出街大破財(二)~~

琴日係工作十三天來第二日假
約左邱醫生兩點整牙
之後一鼓作氣諗住去買去峇里既野、mark低左既護膚品、一d養生食品咁
因為book左6:30同阿b食buffet
所以其實時間只有兩小時
而我既主要target係想買去峇里既衫褲鞋襪
想買colourful既民族裙想買靚泳衣想買草帽!!!
不過我在銅鑼灣買唔到我想要既野!!!!
因為時間太少我冇行小鋪
只係行左sogo同times square
好明顯我就係選擇錯誤!!
唯有下星期再去買過!!!!

洗唔到呢筆錢
總會洗到另外一筆既‥‥
我呢個人決定左洗錢個一日通常都係講得出做得到!!!!!
本來護膚品我只係有三樣野係想買
1、clarins既臉部修護用精油
2、shu uemura既卸妝油
3、kiehls既護髮用品

本來冇可能超過1k
點知最後我在shu uemura洗突哂!!!!
join埋member!!
第一次去就失守‥‥‥


下面綠色個枝係綠茶抗氧化卸妝油
我想試好耐架喇
但每次用完貪近就買左fancl
我用左好多年fancl
用完之後要再同洗面奶過水
但佢就唔需要
我琴日第一次用感覺好正~~~~
好乾淨而且唔會乾!!!!

之後買左藍色個枝tzone控油精華
去到呢度本來完架喇!!!
點知我多口問有冇按摩用既精油
佢話佢地有枝都幾出名既按摩膏(白色個枝)
可以平日邊蒸面邊按(裡面有藍色粒子有埋磨沙功效)
可以去除毛孔內既污垢
ok啦都係我想要既野
又買‥‥‥

買完佢就同我講有個$200set(黃色個set)
有一枝小卸妝油(可以帶去bali用!!!)同一枝有防曬功能既噴霧base
試過質地幾好又買埋
去到最後唔爭在買埋佢地都出名既補濕mask
($440 6pcs!!!)希望真係有用啦~~~我諗住影相前keep住敷!!!

買左成千五蚊入埋會

佢送左個化妝袋俾我啦~~本來我都冇感覺
不過入面竟然有放掃既袋仔
加左d分~~
之後就係中間個三枝紅色野
分別係卸妝油、爽膚水同精華液(琴晚即試左感覺幾好!!!)
仲有中間毫不起眼的唇彩(本來就要買，而家可以用住先!!)
同埋d sample仔

其實我最想講既係
佢地會送新member一次修眉同化妝服務
化妝我未諗幾時試
不過修眉就決定左去峇里前兩日修!!!!
打算個日先修眉再修甲再去joseph到拎衫!!!!
(當然係阿b拎!!!)

仲要預時間去焗油同染髮!!!!唔知可唔可以同一日呢!!哈哈!!
因為全部都在港島嘛!!!


在shu uemura玩左成個鐘
好彩玩到冇哂時間要即刻去食野
唔係個荷包都唔知點算!!!!!!



唔知係唔係個個都係咁
未去旅行先洗一大筆呢﹖

因為除左上面既野
我而家仲猶豫緊
究竟我點載d衫過去呢﹖
我地要咪要買個大喼呢﹖
d鞋又點算呢﹖
OoO‥‥‥

無事出街大破財(一)!!!

敗給Matthew Yau
已經唔係第一次了‥‥‥

誰是matthew yau???
就是我和b新換的牙醫了!!!!!

由於我之前洗牙都冇特定牙醫
阿姨個排話邊個ok就邊個
都冇理
但由於阿b要突破心理關口
所以詢問朋友意見
於是kashi同細路女就介紹左在中環既邱醫生俾我地
洗牙$$640
自覺ok價錢
點知阿b去完之後要千六蚊落樓!!

點解﹖

因為邱醫生見新客一定要先幫你照張x-ray同你分析存檔
(佢真係好仔細分析的!!)
然後就詢問阿b咁怕睇牙醫既原因(真係傾計咁傾!!)
當然係不外乎痛啦!!
於是在洗牙過程中就打左麻醉針
最後仲有止痛藥拎走添!!
而呢d樣樣都係錢!!!!!!

咁點解我都再去﹖
因為阿b話佢真係人好手勢好囉!!!!(除左多費用之外!!!)
仲話訓係度整牙時天花板會播戲俾你睇分散注意力添!!!
(咁我當然唔係為左呢樣野去啦‥‥!!!)



到我親身睇完第一次之後
我想講
邱醫生真係好細心同手勢好好
我之前都在中環、銅鑼灣睇過不同牙醫
不過真係以邱醫生最令我舒服==唔痛  (我係絕對唔需要麻醉藥架!!)
但亦係以邱醫生收費「最貴」
(唔係洗牙貴，逐項服務分開都唔係貴，而係佢唔會好似d一般牙醫咁你叫佢做乜就剩係做乜，佢係真係好想幫你d牙變得完美，而完美係要付出代價既‥‥‥)
而佢既好人好手勢
實在令人盛情難卻
所以
我只好繼續跌入呢個深淵‥‥‥



第一次去
一張全副牙xray
一張大牙xray(因最後一隻有黑點怕有蛀牙要照)
加埋洗牙
一千三百幾落樓


今日去第二次
因為要補隻大牙(真係有蛀到!!醫生話個隻生歪左我平日擦唔到呀!!)
順便補多少少有缺陷的牙(自己冇事搵事做!!!!!)
再加埋進行牙周病檢查(因為我屋企人有所以我都有輕微呀!!遺傳架!!!!)
又二千三!!!!!


八月仲要覆多次診!!!!!!!!!
做一個深層清潔!!
到時最少又八百!!!!



我想講
我對邱醫生真係又愛又恨!!!!
佢真係好細心咁想幫你
而我都真係覺得我每次去完都有不同明顯改善
只係
我睇牙就黎睇到破產喇!!!!!!!!


如果唔係為左結婚為左靚(乜唔係應該為左幾十年既牙齒健康咩?!!)
我應該唔會肯俾錢攪咁多野!!!!!
好彩我忍口冇問漂牙咋!!
唔係又冇最少3-4k!!!!!!



總之
奉勸各位姊妹
愛錫自己既牙齒(其實我都有架!!我都好無辜架!!)
如果唔係
牙齒越靚既結果
就係係荷包越扁!!!!!!!!!!!!!!!


嗚嗚嗚‥‥

preparation for prewedding again‥‥

除了去左joseph到揀衫、拎左阿闊多黛
同埋終於知道自己住邊間villa之外
(就係玉桂!!!阿b話已經唔算貴，但係原來都成五千幾六千蚊晚!!!!
我即刻將我在書展買個本峇里旅遊書扔開!!
我決定日日死守villa做貴貴spa同hea!!!!!)
我淨係為prewedding著咩色裙已經煩死‥‥
其他乜都冇時間預備!!

事緣係在joseph到揀左2套婚紗一套紅色晚裝
打算在淘寶淘多條
問題黎喇~
第一、淘咩色
第二、淘咩款

先講款
試完衫個日(其實試衫前我已經知道)
我係鍾意A LINE亦係著A LINE最好
可愛娃娃實在唔係我杯茶
不過在揀婚紗時最後都係揀左一BALL GOWN一A-LINE
而紅色EG就一定係A-LINE啦
咁淘既款我鍾意親既又係A-LINE
而我又衰唔鍾意著短/前短後長既
唯一想試既係魚尾款
不過一來唔敢搏在淘寶淘魚尾二來總覺得峇里適合飄逸款式
所以雖然好似好悶
但最後都應該係淘A-LINE‥‥

而由於又係A-LINE
顏色係呢個時候就顯得好重要喇
已有一條鮮紅
而我都明白峇里係應該襯COLOURFUL既顏色
只係呢要我憑空想像自己著一D廿幾年黎衣櫃都冇既顏色真係好困難
鵝黃﹖粉橙﹖粉紫﹖湖水藍﹖粉紅﹖
呢幾隻以頭三隻色最有機會!!
(如果係你地會揀咩色影陽光與海灘呢﹖)
而由於我又揀唔到既關係
我應該會淘兩條!!!!!!!!!

其實睇中既款都唔係我想選既色
我只可在色版揀色
然後想像個款配唔配合!!(淘都淘得煩過人!!!)
所以我真係好煩惱!!

仲有就係
究竟你地影PREWEDDING換幾多套衫呢﹖
我想知轉衫同轉妝耐唔耐呀﹖
剩係衫呢PART已經煩死
我仲未諗頭飾(頭花﹖)、飾物以及由於我仲未見到JOYCE個花球
所以我唔知會夾埋會係咩style‥‥

因為2/8後先做完外快
之後又要做學校野轉眼就會去影相
我真係驚到時忙到一頭煙帶漏野!!!!

我真係等左呢個trip好耐喇
希望可以一切順利
玩得開開心心啦!!
而家日日坐到傻
真係好想好想快d飛去bali
仲有一個月!!!!!!
而家唯有得閒望住本旅遊書
當止下渴啦!!!!!!!!

以下就係我地住個間VILLA 喇!!!

我好期待食「日出早餐」呀!!

書展~

做外快既得著係可以搵多萬幾蚊
但係冇左十八日既自由
得兩日假期
第一日在7.20
做laser-->書展-->元朗dinner-->volley9-11
真係搵命搏咁!!

講番書展
話哂都係中文人
以前去真係買好多好多小說文集
其實直至買樓前都係
不過呢年幾兩年我真係少睇左好多書
因為有其他太多野要睇!!!!!(大家明架啦!!!)
所以本來今次入去係想買番d書睇充實下心靈
喚醒下靈魂
點知
我買左一大堆
1、公仔書(左左右右@文地、我的低能湊b之道2、幾米)
2、旅遊書(本地+峇里)
3、食譜(嚴格黎講係甜品書!)
4、養生護膚書!!!

第四part係我在書展花左最多時間既一part!!
我在那台灣檔子企左成個鐘!!!
因為本本都好想買!!!
最後買左呢兩本!!

大家睇下右面個本d label!!!
我未睇過一本書要睇兩次仲要貼label!!!!
證明左
1、我既皮膚體型身體內部全部都需要急救!!!!!!prewedding就冇得救架喇!!
唯有放長線希望wedding day甚至之後既人生可以改善到啦!!
2、書裡面睇到的方法簡單、易做、合理~~最重要我buy!!!!
佢提到按摩既重要(我最最最鍾意!!)、用精油既好處(我成屋都係!!!)、食療對身體既影響(我真係要注意下)同埋天然物料美容法~~~簡單又易做!!!不過我知道我d呢雙子人可以keep到既時間唔耐，所以我只係試左d簡單d既先!!

一、每晚浸腳半小時以上(中途當然不停加水啦!)其實好耐之前我有試過，不過keep唔到，又唔覺得有效~今次本書話可以落幾滴香薰油落水，浸之餘仲可以按埋腳!!佢話可以通血氣同令雙腳滋潤，後者我未知知，但通血氣一定有，每次浸完我都出哂汗(佢話係要浸到呢個程度!!)而促使我繼續浸既原因係因為我好似訓得好左!!!!所以我都會繼續浸!!!!(其實一路敷住mask一路浸腳好爽呀!!!)

二、隔一段時間刮一次沙 (正!!)前幾日一見到呢個topic我即刻手癢，事關我之前有時都會幫自己刮!!咁岩我真係好累好累，我感覺到自己好多火，又得我自己一個，所以即刻用b姐在泰國買俾我枝香薰按摩油刮!!剩係刮左雙手雙臂膊頭頸同胸口(背真係唔靠人唔得!!)我剩係刮完隻左手就已經感到隻手輕左!!!!太舒服喇!!!因為刮得太興奮所以刮埋胸口，第一次刮呀我!!!!!之前怕著衫見到所唔刮!!不過忍唔住!!d印超紅呀!!!!!證明積左好耐喇d火!!我刮左成半個鐘多d，不過夠我舒服好多日!!!正!!!本來我想影張相俾你地睇，不過又費事嚇親你地以為我俾人虐打~~所以都係算了!!但我真係誠意推介俾d唔怕痛但又成日周身骨痛既jm，真係好有用架!!!!(不過不可以太密同不可以黎m時刮!!!)

三、無時無刻打下自己!!唔係自虐呀!!係用拳頭捶打自己d手手腳腳、腰呀頸呀咁，因為全部都同五臟六腑聯繫，有時我地既坐姿站姿都會令到d淋巴腺塞左，血液不循環，自然就影響身體，所以keep住得閒打下自己，點會都打到某d穴位同淋巴腺，可以幫到自己架!!!(如果痛先更加要打，因為證明塞左!!!!)

仲有好多架!!不過唔夠時間!!又要番工喇!!!你地有需要再問我啦!!!

一路打篇blog既時候總覺得自己心境好老咁!!人地個個睇靚衫靚袋靚鞋我睇書之餘仲要睇一本以中醫為本既書!!!!不過人越大越發現健康真係最重要，我真係好想靠內在而唔靠外用物品令自己身體同皮膚變好!!!!所以唯有自己睇多d書注意下!!!!!

大家都要一齊加油啊!!!化妝師可以幫我地化得美美的，但只係一日既事，終究要美要健康，也是要靠自己!!!!!祝願大家都身體健康，當個真正內外都美的新娘!!!

BWING'S HOME 1st anniversary~~飯廳篇

其實客廳仲有好多野想講架!!
例如電視櫃上有七隻可愛貓頭鷹係細佬在日本買俾我既入伙禮物啦
最初時覺得大得滯但睇耐左其實覺得仲可以大d既電視啦‥‥(其實已經47''!!)
另外坐在CD架(佢個名叫collaspe)上既青蛙係我地在台灣買架!!!
未有樓時已買定
放係個度剛剛好~~可以FING下腳仔!!!
不過由於相片唔多冇細項影所以唔講喇飛落去飯廳篇!!!!

睇相先~~
都係一年前影架~~而家又多左d小item架喇!!!!

就係呢三張椅喇!!!!!!我地一直想買三張不同色既同款椅
但發覺原來呢個要求好難架!!本來francfranc有一款係青+白+木面
但係絨面之餘而且冇得拆出黎洗
而且千二蚊張!!!!我地呢d食野咁「小心」既人真係唔好搏喇!!
所以最後在come in訂到真係好開心!!!$699一張~~
而且呢三隻色係我地心水色!!有齊哂!!!!!yeah!!!

而餐桌我一早就決定左要圓形!!!感覺活潑d!!
最後仲搵到係木腳既!!又靚仔!!!!第一次見已經覺得係佢架喇!!!!
不過點都要行多幾間既!!最後都係佢!!!
唔好睇佢好似好細!!!最高峰時試過九個人一齊打邊邊架!!!

吊燈係輕觸式設計~~
靠觸碰表面調較光暗同開關~~
對我地d懶人黎講好方便!!!!

坦白講
我地呢d咁短視既人真係為左追求視覺享受
要空間感
所以成間屋既儲物空間根本不多!!
而呢個在G.O.D既白色櫃可以話好重要!!!!!
用來放零食雜物同鞋!!!!VERY GOOD!!

心水清既你地可能已經發現~
除了燈
我屋企既鐘都不少!!siuming到仲有一個!!!書房睡房都有!!哈哈哈!!!

順便交代一下地板!!!
我地用既唔係真木，亦唔係木皮
係纖維板
而且刻意選有縫(有縫貴好多啊‥‥‥)
磚其實好方便
不過阿b話好唔鍾意冬天踩落去凍到震既感覺
所以要用纖維板~我冇異議~~
不過去到揀邊間公司既纖維板就有分歧喇!!!!
纖維板既出產地、厚薄、代理既公司其實都影響緊個價錢
ikea個隻其實可以$11一呎(以下價錢都係未計手工)
雖然抵但從來都冇諗住揀
始終地板係鋪全屋既
佢有事我成屋都有事!!
所以我地都想搵中價既例如$30-$40一呎既
點知人就係咁衰(我衰d)
當你睇過$60-70既質素時(最貴百幾蚊~幾百蚊不等!!)
你就會嫌三嫌四其他既都睇唔上眼
呢個位我地掙扎左好耐
終於決定以質為先
揀間好=貴既鋪頭-->QUICKSTEP(快易店)
比利時板~~網上除左話佢貴都冇bad comment!!!
但為了慳番out左個part錢
阿b想揀無縫!!!(平around $10-15一呎)
而我堅持要有縫!!!!!!我鍾意一條木一條木既感覺!!
當然最後我贏不過亦為此嗌左裝修時第一場交!!!
(好彩都唔係好多場!!)

住左一年
你要我再講
quickstep師傳手工真係無話可說~~
(阿B都認同架~而家都慶幸揀左有縫添!!!!因為真係靚好多嘛!!)
地板我地固然覺得靚但估唔到地腳線都靚過人!!!

最重要係真係一分錢一分貨
我地四月時經歷既咸水水災
都冇摧毀到佢地一分一毫
師傅上黎check時咁講
連公証行上黎都話呢個牌子既地板多數冇事!!!
所以
都係個句
貴d都值得既!!!!!


上面睇既係廳既其中一面
其實另一面先係我地好放心機既位置
可以話係全屋既精髓!!
呢個就係siu ming櫃喇!!(可能個DESIGNER叫SIU MING!!)

而家siu ming櫃內既野其實已經有d改動喇!!
當然係多左野啦!!!
而右下角個格證明我地屋企係開cafe架!!
勁多board games!!!(我地d朋友都鍾意玩!!)
其實siu ming內既擺設多數係我地以前旅行時買落既野
得好少係之後見到靚就買!!
有一格係專放來自世界各地既貓頭鷹架!!!!
(有印度、希臘、北京、布吉、台灣、葡萄牙‥‥‥多謝我d好朋友!!!!)

俾一格closeup你地睇丫!!!
呢格係黎自不同地方既明信片
有d係有郵chop有d冇~~咁樣放好colourful好開心!!!

siuming旁個張白色小椅係用黎著鞋架~~我地特登預留位置架!!
出門口時好方便!!!!!!
銀色鞋櫃係FRANCFRANC買架~~靚LAW!!
不過係放唔到太多既!!!!!


總括而言
我地成個廳都花碌碌
貫徹要玩既感覺!!!
有時都幾慶幸我同b在呢個位上好夾
想像下
如果我愛colourful佢愛黑沉沉
或者我鍾意全屋公仔但佢見親就討厭
咁雖然都會互相遷就
但始終有點美中不足嘛~~~
therefore
i am so lucky 呢!!!!

下篇仲會介紹搖搖椅以外同樣極受客人歡迎的傢俱!!!
敬請期待!!!!!